（資料圖片，攝：柏齊）
（獨媒特約報導）不少人視2007年的紮鐵工潮為工運的成功模範——往後幾乎年年加薪、回復8小時工作、成立工會。十年後的今天，群眾運動陷入前所未有的低潮——傘後的無力感淹沒運動中人，政權窮追猛打，打壓公民社會每一角落……十年前的紮鐵工潮，對現時運動有何啟示？
今天回望，紮鐵工潮無疑是振奮人心的一場運動，但當時對許多工友來說，只是一場慘勝。罷工36天，高峰時期足有1,200名工友參加，最後只換得加薪10元及回復8小時工作，不少工友感到失望，左派報章翌日更揶諭是「10蚊搞掂工潮」。
職工盟組織幹事吳冠君當年任職地盤工會幹事，他回顧當日決定，「到而家人工仲係咁升，跟返行規8個鐘（工時）。你睇返呢十年，那個收割（結束工潮）當然係正確，如果當初係潰敗嘅，即係好似佔中咁，潰敗、爛尾嘅，冇人再相信你嘅行動，冇人再相信集體領導係有用。」
職工盟組織幹事吳冠君
「罷工啦！忍夠啦！」
見證工潮始末的紮鐵工黃惠民（阿Man）憶述，最初是工聯會的紮鐵工會約工人開會，其他工友叫他一起參加，他抱住「上去八下」的心態到場，才得知土瓜灣天光道「半山壹號」地盤出了通知，日薪加50元，由800元加到850元，但同時工時由8小時30分鐘，延長至8小時45分鐘。「啲工友就覺得，嘩，應該加工資嘅時候你加長咗時間，喺我個工時度攞返工資，即係唔係加工資啦。」1997年紮鐵工人日薪為1,200元，經歷了金融風暴和2003年沙士，結果十年來不加反減，工時更加長了。
感到付出與收入不成比例，阿Man也曾轉職其他行業，做過保安、雜工、金屬棚架等，「我做雜工同金屬棚架嘅工資係低過紮鐵，但嗰啲係我唔熟嘅，我唔介意。如果我做返紮鐵，係我嘅專長，反而我會介意工資低咗。」他說，紮鐵行業的技術要求甚高，工人需要理解建築圖則，「開料」時準繩度要高，鋼筋才紮實，而鋼筋分佈亦都有嚴格標準，初入行的工人需要花好些年才學滿師。除了技術精，紮鐵對於體力的要求也隨著大廈愈建愈高而提升，「以前一個工人做幾擔就夠，現在以『噸』計，一個工人做幾噸，一噸有16.8擔，工作量多幾倍，體力要求巨大。」技術和體能要求愈來愈高，人工卻愈來愈低，工人的忍耐到了2007年終於到達臨界點。
當日出席工聯會會議的約有100多名工人，大家都對資方提出的「加薪」很不滿，有工人在會議中忿然提出罷工，隨即得到同場工人和應，有「蛇頭」更在其他地盤號召工人參加。但召開這次會議的工聯會卻表示只會聲援，不會介入罷工。「工會唔應該係聲援，應該係帶領或者協助，係咪啊？」阿Man回想起仍深深不忿。
黃惠民回到當年罷工現場，「半山壹號」早已建成。
成功升級「要多謝工聯會」
2007年8月7日，天光道地盤聚集了數百名紮鐵工人開始罷工，但卻不為外界所知，就連職工盟地盤工會幹事吳冠君也是罷工開始了一兩天才收到消息。冠君帶著大聲公和傳單到場，「我帶咗啲資料比佢哋睇，大家一睇當然好慶，原來啲判頭收政府部門成千蚊一工！」冠君又向工人喊話「你哋咁多人罷咗三日工，冇人知道喺天光道有單咁嘅嘢。你哋一定要將呢單嘢升級！你哋咁多人，唔好淨係困喺呢到，冇人報導，咁就冇人理。」工聯會一聽到冠君鼓動工人就十分緊張，找來警察趕走他。「其實都要多謝工聯會，佢趕走我嗰下，先至令到成班工人起哄。」
未幾，地盤外有6架旅遊巴駛至，原來是工人自發召車上禮賓府，「好神奇，跟住叫埋我上去，『上嚟呀，四眼仔。』」數百名工人到禮賓府外抗議，旋即成了傳媒焦點，罷工終於得到外界關注，工人們都興奮不已。經此一役，工聯會已經失去了大部份工人的信任，當時甚至有傳工聯會要求工人領袖解散罷工，，工聯會代表到地盤嘗試拉攏工人時更會被潑水，斥責他們出賣工人。
另一方面，職工盟因此役贏得工人信任，每天都到地盤與工人商量對策——如何升級、到哪裡遊行、到哪個地盤抗議等等，「變成你同啲工人一齊領導個運動，唔係純粹我哋組織者去領導。」
冠君指，這場工潮除了與資方拉鋸，還得與工聯會角力。工聯會屬下的紮鐵工會組織工人多年，始終有其「基本盤」，而且與資方關係緊密，掌握更多消息，可謂站在有利位置。
（資料圖片，攝：柏齊）
有一次，工人代表原本約了商會星期一進行談判，但工聯會卻偷步於星期日和商會開緊急會議談判，決定將工資加到850元，每天工作8小時15分。工聯會指這條件已經「冇得再講」，「如果你哋認為唔滿意嘅就繼續罷工，我哋唔會再理你哋㗎喇」。工人們聽到都十分憤怒，向工聯會代表潑水，更掟水樽和紙皮，因為工聯會原先要求日薪950元及8小時工作，與現在的落差太大。
有些工人建議阿Man向工聯會了解情況，但只換來對方一句「你想了解啲咩啊，已經講好咗㗎啦，係咁㗎啦」，就連要求拿咪高風向工人們喊話幾句也被拒絕，「呢個mic係我哋嘅，我唔會借俾你」。阿Man走回去向工人交代，被記者包圍追問，「我話乜嘢都了解唔到。點解會咁呢？其實感覺係好無奈，對唔住啲工友。你選得我出嚟，我係應該要幫到工友，了解情況報返俾工友聽，但我做唔到，所以當時有感觸 。」阿Man在那刻流下罷工以來第一滴眼淚，「我唔怕自己蝕底，但係我唔想人地蝕底」。
超過一個月的長期抗爭，壓力絕對不少，阿Man有否想過放棄？他笑言「會攰，但唔敢諗放棄」。因為一旦放棄，回到地盤會「畀人睇死」，因此即使曾因有工人打架連帶他被拘捕，也不敢輕言放棄。
阿Man亦體驗到工聯會行事是「由上而下」，但他認為應「由下而上」，因為工人才是工會的後盾，「你係代表工人，而唔係凌駕工人，所以係有啲感觸囉，感覺我哋係被遺棄嘅一群」。
在罷工集會現場的吳冠君（戴眼鏡者）。（攝：柏齊）
「10蚊都照食」 要讓工友看到希望
「最尾個日其實有眼得睇，得300、400友喺政府大樓，比起全盛時期超過1,000人喎，諗下差幾遠。」冠君說。
大家眼見工潮走下坡，便知議價能力已大減，不能再拖。阿Man代表工人和資方談判，他今天回憶，指當時爭取回復8小時工作是最重要，工資倒是可以商量。「8小時同8小時30分嘅分別，分分鐘係工友嘅生死存亡關鍵。我哋多體力勞動，做完8個鐘已經好攰，再做多30分鐘可能會引致工業意外，因為精神專注已經開始放鬆。我入行之前都係8小時30分工時，但當時天氣冇咁熱，鋼筋冇咁重，因為啲樓冇咁高，所以已經唔同咗。」
最後談判結果為8小時工作和860元日薪，即僅加薪10元。鬥了30多天，只換來加薪10元，當然有人不服氣。冠君指，「我哋都有幫工友分析，大家如果再鬥落去，有冇力量先，如果鬥唔到，或者如果你預計唔到有任何轉變，我哋到最後係點樣收場呢？大家承唔承受到個後果，想唔想係咁？講比佢哋知，佢哋都明白嘅。」
加薪雖少，但至少有實際成果。「對我嚟講，一定要比工人接受呢樣嘢。如果你冇一個full picture，小勝都做唔到，係唔能夠期望下一步有任何勝利可言。人係咁，人嘅心理係咁，你有少少嘅勝利希望佢哋覺得攞到，佢就有更加大希望攞多啲；如果你乜嘢都覺得自己攞唔到，佢就唔會再鬥爭。」冠君續指，「即係等如雨傘一樣，我佔領咗70日都無料到，咪暴動囉，去旺角囉，但都係無用呀。其實作為組織者，要預計埋之後下一步有咩成果比啲群眾攞到，呢個攞到嘅成果唔單知止係嗰10蚊，最重要係覺得自己嘅付出係有用。雖然未必去到最高嗰個目標『真普選』，總好過你覺得自己嘅付出完全失敗。」
工人體驗到親身參與談判的重要，職工盟於工潮結束當晚，便決定成立「紮鐵業團結工會」，以作長遠抗爭。阿Man現時是工會總幹事，他指經過工潮，工人的抗爭意識增強，不再任由僱主剝削，亦開始信任工會，「知道人唔可以單單忍，唔可以太冇危機感，唔識抗爭。有抗爭先有進步，當然抗爭未必可以達到目的，但你唔抗爭一定冇，乜嘢都冇。」
儘管第一年只加薪10元，但其後除了2008年金融風暴凍薪，每年都有超過10%的加薪，增長跑贏大市，到了今天日薪已升至2,370元，工時維持每天8小時，酷熱天氣下更有額外休息時間。
（資料圖片，攝：柏齊）
記得鬥爭歷史，記得自己的能力
紮鐵工潮翌年，便有三個工潮出現，維他奶、屈臣氏和雀巢三間飲品公司的運輸工人接連罷工，爭取加薪、合理工時等，之後亦相繼成立工會。冠君相信，這是紮鐵工潮泛起的漣漪效應，「佢哋（工人）睇到原來有得話事，雖然唔關佢事，但會比到希望佢哋。」
到2013年葵青貨櫃碼頭罷工，歷時足足40天，全城關注，也是受紮鐵工人的經驗鼓舞，「望住紮鐵工潮嘅36日」來堅持，「紮鐵佬都罷到36日工，我哋一定要堅持落去！」
不少人認定雨傘運動是場失敗的運動，佔領79天沒有取的成果。訪問尾聲，冠君問兩名記者知不知道有薪產假是何時實施，記者回答不來，只得搖頭相視而笑。「有薪產假『前四後六』都唔係自有永有，係1980年先立法，換言之70年代有好多女工出嚟抗爭過。工人好大問題就係忘記鬥爭，（以為）所有嘢都係政府皇恩浩蕩咁施捨比你。」
「呢個係我哋社會能夠趨向穩定嘅原因，但如果你記得鬥爭歷史，你就會覺得自己有用，覺得自己有能力改變。」
記者：石姵妍、劉軒