（獨媒特約報導）打開張秀賢的政綱，厚得很，用梁振英的術語是「方方面面」都有。張秀賢指中大學生會訓練了他如何寫好政綱，「傾莊傾成兩個月就係寫政綱，我要參選一定要寫到咁厚，咁先全面，先對得住立法會議員呢個位。」張秀賢接受獨媒訪問時表示，如果進入議會應和專業議政有較多合作。「你見到我政策擺咩係頭：經濟同創科，呢啲比較合我興趣，同埋係民主派比較缺乏的領域。」
「如果係有諗法嘅就唔會支持領匯上市，因為當時係民意支持。民主派真係有諗法，就唔洗鋪鋪都跟民意，民意話支持就支持，政治領袖最重要係帶方向俾人。」張秀賢認為民主派在經濟政策缺乏想法，指如果要議會過半，在目前的政制下強攻功能組別是唯一出路，所以應著眼有個人票及公司票並列的批發零售界同飲食界。
比最激進嘅溫和 比最溫和嘅激進
相約張秀賢做訪問，地點在大圍，他帶記者去了一間咖啡店。原來他早前從屯門搬到大圍，為往來東鐵沿線做準備。張秀賢早前接受《立場新聞》訪問指「抗爭手法應該類似人民力量，政策立場則介乎公民黨和工黨」。他對獨媒強調是「要我夾硬分我先咁分」，認為因為家人和自己都是做生意的關係，「其實係不左不右」。
「溫和，我一定比最激進嘅溫和，你問我激唔激進，我又一定激過民主黨、公民黨；起碼我真係會企出嚟。左，我一定無社民連左，咁有啲位一定好左，勞工或者社福政策好左。右，我無民主黨果啲咁右。但十年前領展上市，一定反對。」
他續指在幫基層之餘，更應協助中小企：「中小企多數係個體戶，養人為主。一間茶餐廳都係中小企，佢哋都受到大財團同業主剝削，咁點解唔幫中小企？民主派應該建立中小企力量。唔應該俾自由黨表面上幫中小企，實際上幫大財團。」
張秀賢曾公開表示「不應該太早從政」，但今日卻劍指立法會。他重申參選是因為DQ：「嗰陣黃台仰搵我去選，咁我覺得應該花兩年時間為個陣營作出啲貢獻。」張秀賢表明如果當選只做兩年，絕對不會連任。「我想真係搵錢、讀書同要支持其他人，所有人都要搵錢。」除了搵錢，張秀賢還想趁年輕，去外國讀書擴闊視野。「我讀大學嗰五年無去過 exchange，係一個遺憾。」
中大政政系畢業，張秀賢原本想做生意搵吓錢。「有諗過選，一定會，但無諗咁早選。」他原本計劃40歲參選立法會，不點名指另一區有候選人正是「政壇關愛座」：「人生目標唔應該set喺立法會入面。廿幾歲做議員，你選到幾時先完呢？要選到60歲，即係仲有30幾40年喎，呢40年你淨係喺立法會度做？不斷為政治服務，但你無咗自己。」
承認與「雙學」格格不入
學民思潮發言人、中大學生會會長和學聯常委，這是張秀賢六年來的身分。黃之鋒在 Facebook 邀請他加入學民思潮，打開了他的從政之路。張秀賢認為學民的日子讓他見識了不少，令自己開竅。「國教同政改係我心目中人生入面幾大嘅仗。」後來因為政改就公民提名應該單軌或是雙軌，而鬧得不快，他堅持應該雙軌制，所以最後決定退出學民思潮。
如上曾言，張秀賢指中大學生會教識他寫政綱和跟進議題：「中大學生會個訓練係幾all-rounded，如果無入，我今日都幾廢。」入過學民，做過學聯常委，但他的政治啟蒙卻是打住務實本土旗號、新民主同盟的譚凱邦。對方是他的中學老師，帶他跟進發水樓和屏風樓等議題。譚凱邦在2008年參選九龍西，張秀賢便已替他助選。今次補選各為其主，張秀賢表明「無所謂」，因為大家都是民主派，又暗示不少人都「有邊企」。
張秀賢一直被指和學民思潮和學聯的前成員的關係麻麻，甚至認為他是投機主義和「彈出彈入」。張秀賢斬釘截鐵地回應，指做人的政治策略應有彈性：「如果我要歸邊，今日條路好好行，過對面陣營又得，眾星拱照都仲得。」他重申，在不少大是大非問題上「仍然堅持」，例如堅持平反六四。
「衰啲講句，我唔係同呢班人過世呀嘛，其實講笑。」張秀賢不諱言，和雙學的前成員甚少聯誼。他表示，如果仍然留在學民思潮和做「一個跟大隊嘅人」，未必能走到現在的路。張秀賢又不否認，在三段時期和組織時都有點格格不入，指學聯和中大學生會當時都是左翼路線：「但我唔係一個堅定左翼信奉者，只係中間偏左，你話格格不入就一定嫁啦。」而且經歷和興趣亦不一樣，「佢哋會打 LOE 我唔會」，溝通中只有公事。「大原則同大理念，我一定會跟大隊，因為嗰件事係啱同唔啱，對與錯嘅問題。但只要果件事唔係去到呢個位，係政策嘅判斷或睇法，點解要跟大隊呢，點解唔做包拗頸果個呢？」
問到誰是其「親密戰友」，張秀賢指2016年立法會選舉時曾為羅冠聰站台和為區諾軒拉票，認為有只要有共同目標都應該是朋友。「我去到依家同本土派溝通，覺得所有人都make friends，只要反威權、爭取普選同最大嘅自治空間。」
嘆民主派執念太多
在早前的初選論壇，城大政治及行政學系公共政策學系高級特任講師張楚勇質疑，張秀賢能團結民主派的說法，張楚勇認為其答案不夠具體。獨媒讓張秀賢再答一次，「具體政治承諾、犧牲自己，係當今促進團結唯一方法。」張秀賢強調，沒有任何參選人有相關承諾，包括捐一半人工予抗爭者支援基金、只做兩年不連任和將議席公有化，把資源撥予民主派在地區上使用。
「邊一個可以去到呢種程度去做咁具體嘅承諾？將自己資源唔納入自己政治籌碼，我做呢啲嘢無 so 嫁喎。」說罷，他還拋下了一句「執念太多」，慨嘆民主派各個政黨只以黨的利益行先。
「有啲人無政治倫理」
談到本土派加持，張秀賢顯得有一點點沮喪。訪問當日，社區網絡聯盟劉穎匡尚未宣布有意參選。本土民主前線黃台仰和青年新政梁頌恆在去年九月，曾相約張秀賢和民主動力副召集人鄭宇碩會面，二人當時都表示願意支持他。但事情發展有點像電視劇，黃台仰疑似潛逃，梁頌恆在張秀賢參加初選後亦沒有再表態。「我覺得經歷咗咁多事之後只有自己係信得過，佢走唔走唔係我控制。我都唔知點答呢個問題，事實就發生咗，你唯有當我傻仔啦。」
張秀賢認為，民主動力沒有將會面的結果轉告民主派，令局面更「奇怪」。「工黨係應該要知嫁播，而根據明報報導，新民主同盟更加係反對被DQ者出嚟選，所以有啲人係無政治倫理囉，講完。」
指應把握機會宣傳力抗DQ和反威權
張秀賢形容自己是「唯一一個個叫有案在身」的參選人，他重申今次補選是政治運動，民主派要全取四席有一定難度，但應把握機會宣傳力抗DQ和反威權。他指出，如果姚松炎勝出初選則代表DQ，連同香港眾志的周庭，對方是代表DQ及政治犯，加上自己都有案件在身，便能發揮風車效應，提高投票率。他的家人支持他參加社運，雖然不至於積極拉票，但他的祖父跟隨國民黨走難來港，「咁嘅家庭環境點會反對我做呢啲嘢？」
不同意郭永健工黨工聯會對決論
今次補選是單議席單票制，從目前形勢來看，三名民主派參選人都沒有2016年時公民黨楊岳橋的形勢和氣勢。距離初選投票餘下不足七日，張秀賢認為目前有點倒瀉籮蟹的感覺，因為三人都沒有初選經驗，自己在溝通上可以做得更好，「不過大家都係，沒有誰比誰高尚」。對於郭永健的工黨和工聯會對決論，張秀賢不同意：「你話工會同工會對決，咁潮洲人同潮洲人，區議員同區議員對決好唔好？如果係嘅，係唔係應該搵個師奶同師奶（新民黨陳家佩）對決，搵個區議員同區議員對決呢？」
談到潛在對手、建制派的鄧家彪，訪問當日便經過工聯會在大圍的服務處，大頭海報比新年的揮春還要多。張秀賢認為對方有民建聯、工聯會、新社聯和公民力量的加持，「咁係唔係推一個人代表晒咁多個黨呢？你最尾代表民主派選嘅，我諗職工盟都會支持你掛。你只要個政綱係諮詢過即職工盟意見，咁其實已經係可以勞工政策足夠同鄧家彪去撼啦，咁唔係一定要有工會同工會去對決嫁，你估鄧家彪真係會打工會牌咩？」
張秀賢認為做立法會議員有一定風險，要有隨時被DQ、追薪津甚至入獄的準備。「你無呢啲心理準備做咩立法會議員？唔關咩背景事，你要諗清楚係咪孭得起呢個代價，范國威、郭永健都要諗。」他最後又重申港獨並不可行，而應從現時的政治環境中尋找出路，令高度自治能夠走下去：「香港依家獨唔獨立到先，呢10年獨唔獨立到先？做咩仲要花時間糾纏喺支持定唔支持？」
記者：麥馬高、李嘉雯