（獨媒特約報導）劉小麗放棄就撤消議員資格案進行上訴，立法會九龍西一席預料在年內進行補選。劉小麗表明積極考慮再次參選，但一旦遭 DQ未能入閘，屬意由工黨副主席、前立法會議員李卓人任 Plan B。民協副主席何啟明接受訪問時表明反對「周庭模式」 ，認為民主派應透過初選凝聚支持者的共識。
民主動力在去年舉辦初選，香港眾志羅冠聰在港島被DQ的議席原定由周庭出戰，但周遭當局無理DQ，區諾軒隨即報名參選。劉小麗表示民主派已普遍接納以「周庭模式」處理九西一席，但民協馮檢基接受港台訪問時認為「推薦」是威權政治。何啟明則稱推薦李卓人是善意的舉動，但認為做法不理想，指這是放棄了「有爭議但相對進步」的初選：「走回頭路欽點，好可惜囉。」
「港島相對簡單，民主黨和公民黨各有一席，經驗話我知，無人嚟就搞唔成（初選），咁機制喺度，有人嚟（參選）咪run 個機制。」何啟明認為，「周庭模式」的出現有特別原因，在去年商討初選時，因為沒有政黨對港島一席有意思：「如果唔係初選就包埋（港島），只係過程中無人出聲吧。」
劉小麗已表明積極考慮再次參選
「劉小麗有權，佢有權優先去選，所以支持佢係Plan A 身分去選。但如果佢選唔到，我哋都要諗點settle 民主派諗法。就算唔係李卓人，當係陳卓人，佢都要講到俾大家聽點解要支持佢。」他表示認同劉小麗做Plan A，但更認同在高風險下要準備好plan B，只係討論用怎樣的機制決定Plan B，「佢推薦只係民主派陣營有共識，但支持者有無呢？未知嫁播，所以就要靠初選凝聚民主派。」
「要大局為重撐一個候選人，唔係你嗡就係，要有機制說服到人嫁嘛，所以要初選。」何啟明強調每名候選人都有好處和弱點，所以便需透過初選去處理。他重提在3月時曾喚民協支持者票投姚松炎，但對方稱「我唔識佢、我唔想投俾佢」，何對他們表示願賭服輸，希望民主派共同支持。「如果無初選，點說服支持者呢？又大局為重？又民主派就算？點解推薦佢唔推薦你呢？」
建制派不排除由前食物及衛生局局長高永文參選，另一潛在人選為經民聯深水埗區議員梁文廣，蠢蠢欲動拿下九龍西第四席。而民協目前仍未就補選作商討，何啟明表示不排除會參加初選。他又坦言今次補選是一場硬仗，「搵我都唔敢即刻話去」：「輸咗仲要承擔責任，好難打，而且上任時間較短。」
前食物及衛生局局長高永文日前到佳曉為建制派助選
記者追問是否做好準備，何啟明亦答得爽快，指自2016年參選超級區議會選舉時已準備成為立法會議員，「今次真係無得再輸，已經係士氣問題，再輸就無的了。」
在去年的初選中，民主動力以實體投票、民意調查和民主派友好團體投票共三項評分標準。「其實都係呢啲，我都諗唔到第四個方法。」何啟明強調初選一直以來都是人的問題多過制度的問題，指「純民調」是參考台灣，相對科學客觀，但民主派支持者其實十分想參與其中：「應該俾支持者有參與（實體投票）嘅機會。」
何啟明又認為，民主派是第一次透過初選處理紛爭，希望未來的補選及換屆選舉繼續執行。他早前公開批評有人不願賭服輸，對記者進一步解釋指：「唔係一個人囉，大家一見到Plan B 係基哥，就即刻反枱；所有講過呢啲說話嘅人都係唔願賭服輸的人。」他建議民主動力在未來的初選制度上應強硬一點：「無得講，結果出咗嚟，就應該跟機制。」
馮檢基在去年初選時又曾表明已是最後一戰，但日前有傳他有意退出民協另起爐灶，擬再次劍指九龍西。何啟明表示相信馮檢基會履行承諾，「但都無人阻到任何人參選嘅」。
記者：麥馬高