（獨媒特約報導）世界盃決賽週分組賽進行得如火如荼，衛冕冠軍德國首場將迎戰墨西哥，東九龍社區關注組的陳澤滔是德國球迷。2015年參選區議會，在觀塘康樂選區僅以99票之差落敗，不敵建制派的馬輓超。一年後再參選立法會九龍東，陳澤滔當時打住明撐港獨的旗號，但都是落敗。三年下來，時移世易，DQ不斷；陳澤滔對選舉早已死心，慨嘆和形容自己是「連外圍賽都入唔到的球隊」。
2016年立法會換屆選舉過後，陳澤滔繼續在主題公園做工程師。然而，政治氣氛每況愈下，不要說區議會選舉，連參選鄉郊代表選舉都即將要簽確認書。陳澤滔坦言，在人大釋法後已沒有任何奢望，早已預視到這一日：「自己一向較悲觀，一早已留意條文，所以知道係無希望（參選）。」他表明未來將不會再有人用「東九龍社區關注組」參與各級選舉。
耳濡目染下喜歡德國
爭取衛冕冠軍的德國其實亦曾有過低潮，在1994年和1998年便連續兩屆八強出局，而98年不敵克羅地亞，仍像昨日惡夢。「奇連士文幾型仔，又倒掛又盛，講真呀，好多幾廿年的邂逅其實都無咩特別原因。」1994年美國世界盃，陳澤滔愛上德國前鋒、金色轟炸機奇連士文，自此每屆世界盃都睇到足。除了足球，同樣愛打機，Football Manager、Fifa 和Winning Eleven 均一一玩到廢寢忘餐，「因為打Football Manager，所以留意較偏門的國家和球星。」
「從前我愛西德隊，魄力冇問題，永冇話失咗聯繫，射波好似撳制。你無聽過咩？」他反問記者「無聽過呢首歌咩？」和陳澤滔做訪問需要點耐性，他總是東拉西扯，話題源源不絕。「嗰時仲打Sensible World of Soccer，用德國有希士拿，哈哈。」
記者追問喜歡德國的原因，陳澤滔形容是在耳濡目染下喜歡德國，後來又喜愛中場波歷克。陳澤滔認為，波歷克是近年最後一個能展現德國日耳曼精神的球員，「可以一個人帶住成隊波囉，近年唔太睇到有呢類球員。」
嘆民主派、本土派未能有效溝通
2014年佔領運動前夕，陳澤滔更請了兩個星期假，「全職」看世界盃。陳澤滔指德國隊近年的踢法較細膩，從前則相對簡單直接和機動性強，「少咗熱血的 icon，今屆小組對手都勁嫁，但應該至少入四強。」
「本土派都唔認我係本土派啦。」參與511預演佔中，雨傘運動期間留守金鐘，陳澤滔強調，當時站出來的原因是眼見大台（傳統民主派）和本土派未能有效溝通，「希望可以令雙方對話。」
早前有學生會未能在聲援戴耀廷的集會上發言，陳澤滔和另一本土派選委王百羽遂在民主派資訊科技界選委 IT Vision的群組中，向民主派會議召集人莫乃光提出。他不諱言，雖然未能改變傳統民主派的想法，但認為對方至少肯聆聽。
四年過去，本土派和傳統民主派依然水火不容。「好似無咩進展。我懷疑自己係咪真係可以改變到佢哋呢？定其實係我自high呢？但其實係做唔到囉。」陳澤滔慨嘆雙方的矛盾已深到無法解決，而近來在觀塘音樂噴泉中亦以「讚的方式」去對待民主派。
觀塘音樂噴泉項目早前在立法會工務小組遭否決，雖然未知道會否硬上財委會。但觀塘音樂噴泉亦是東九龍社區關注組三年來一直跟進的議題，認真程度令人咋舌，「覺得總算有啲交代。」
頹廢的階段
國家隊鍾情日耳曼，球會則是英超利物浦的忠實支持者，陳澤滔第一場有印象的比賽是94至95年的英格蘭聯賽盃決賽，由利物浦對保頓，「麥馬拿文梅開二度，無綫播嘛，記得好清楚嫁。」
小學四年級開始踢波，報過麥當勞足球計劃，陳澤滔身形高佻和手長高長，理應是做運動的材料。但他自言技術很差，而且很快便無氣。後來，在中學時心臟有事，又患上馬凡氏綜合症。「好耐無覆診，上次醫生話，雖然有嗰啲徵狀，但又唔完全係，咪唔覆診囉。」
記者喚陳澤滔用足球形容和比喻一下近況：「1998年世界盃嘅德國隊？」陳澤滔認為現在是處於頹廢的階段。「人哋1996年冠軍（歐洲國家盃）呀，我從來唔覺得自己有佢哋嘅成績，即使佢哋係最低潮嘅時間。真係，我可能只係連外圍賽都入唔到嘅球隊。選舉又輸鬼哂，搞個會又無咩人嚟，做咗啲咩？其實咩都做唔到囉。」
陳澤滔身上的這件德國球衣是他的媽媽所買，事緣母親到德國旅遊，「佢覺得紅色靚，唔知道德國主場應該係白色，哈哈。」
還不止，2009年時到澳洲工作假期，陳澤滔穿著這件紅色德國國家隊球衣「招搖過市」，有德國人問他「有無香港波衫」。「我話無，之後無著了，覺得好醜。」他反省指，自己的地方都不去支持，所以近年買了香港隊的 T-Shirt。
「成個足總摺咗佢再嚟過」
談到本地足球，陳澤滔劈頭第一句說：「成個足總摺咗佢再嚟過。」他認為做好職業足球已是對香港很好的宣傳，「唔覺得香港球員差成咁，但政府至少要令職業運動員有保障吧。搵地產商贊助，俾免稅額，大把嘢可以做，但就攞哂啲錢做基建，根本就無心機搞。」
2015年的世界盃及亞洲盃外圍賽，發生中港大戰的「皮膚」海報事件，再到近年的噓國歌，足球終究離不開政治。陳澤滔亦有入場支持香港隊「撐自己人」，令他難忘的一場比賽是香港在落後卡塔爾三球下，在臨完場前連追兩球：「呢啲咪鬥心同熱血囉。」
他又補充說了一句：「以前賀歲盃睇港聯，無咩球迷打氣，呢幾年真係算係咁。現場睇波同喺屋企睇電視係唔同的。」「鍾意睇波，係想見到努力嘅喜悅同嗰份激情。」
訪問：麥馬高、David Cheng@體嘢
按：【深度世盃】系列由獨媒和體嘢聯合製作，分別訪問了立法會議員、區議員、學者、足球評述員和球迷等，從中多角度透視香港足球及世界盃。