（獨媒特約報導）理大早前強行沒收民主牆，學生會多次交涉未獲回應，學生會會長林穎恒及學生會評議會主席阮柏喨絕食抗議，至昨晚達成共識，重獲民主牆管理權，結束44小時絕食行動。在絕食行動開始後不久加入的中大碩士生呂智恆，近年多次絕食抗議，包括抗議高鐵一地兩檢。呂智恆指，絕食等同以死相諫，「咩時候會以死相諫？就係就快滅亡嘅時候。」
理大學生會發起行動當日（10月5日），目前為中大碩士生的呂智恆正坐車回家，得知理大同學開始絕食抗議的消息後立即折返，加入絕食行動。
呂智恆在加入絕食翌日（10月6日）接受獨媒訪問時指，不止理工大學，過去兩年大專院校不斷打壓學生，「近呢一兩年院校瘋狂打壓佢唔鍾意見到嘅政治主張」，包括浸大普通話豁免試事件、中大譴責某些不合意的政治標語、教大民主牆事件等。他之所以加入絕食，是希望與理大學生會共同堅守信念。他認為打壓來至最高決策者即中共施壓，而校方高層多數同為政界高層。
他坦言絕食「其實係一件好困難嘅事，唔係咁容易做到。」他指自己曾絕食三次，第一次是在高鐵西九龍站一地兩檢司法覆核案件前，第二次是香港與台灣的良心犯被中共或港共政權判罪，第三次是在梁天琦案開審時。他指絕食行動使他的身體愈來愈容易感到冰冷，原本沒有計劃再次參與絕食行動，但他看見還有碩果僅存的學生為自由而戰，絕食人數又少，決定加入。
呂智恆認為，絕食是等同以死相諫，「咩時候會以死相諫？就係就快滅亡嘅時候。」他強調絕食的對象從來並非當權者，而是感染人心。「雖然好多同學未太有感覺或者一份觸動，但你難保兩三日之後有變化出現。」他認為絕食也許能喚醒某些人，令他們希望「做返少少嘢」。
訪問期間，他不時向到場支持的市民道別感謝。
「我覺得香港人最核心理念就係搵錢，搵錢、買樓、搵間好學校。所謂自由、法治都係為咗搵錢，只要嗰樣野唔係燒到埋身，其實佢哋好多仲係好冷漠。」呂智恆提到，很多院校學生會選舉的投票率插水式下降，「佢哋唔會唔關心，但關心嘅程度係咪足以驅使佢哋出嚟爭取？我覺得未到。」
他提到傘後無力感，政府接連的打壓使香港人失去希望，「政治領袖或者有希望嘅人物全部打到殘曬，入獄嘅入獄，逃亡嘅逃亡。」呂智恆認為香港人堅忍不足，「你會見到台灣、南韓、甚至乎係印度，當佢哋政治領袖比人大抓捕，入獄嘅時候，啲群眾係會爆發更加大嘅運動。但香港唔係囉，香港係調返轉。」他對此的失落感大於當權者的打壓，「點解經過一輪失敗之後，大家就已經做返以前嘅香港人呢？」
本身為基督徒的呂智恆，強調參與抗議是源於信仰，「十字架唔係單單擺喺前面作為一個擋箭牌，其實係要背負佢。」他指耶穌對門徒說，要在最細小的弟兄上作工，亦即「苦難者、最卑微、最受壓迫嘅人。」他又引述一本名為《基督徒不服從》的書，當中提到如果只是為苦難者禱告，「咁我拜託你哋千祈唔好再禱告。」他認為基督徒應兼以禱告與行動連結苦難者，自己正朝此方向進發。
他認為現時香港教會回應社會政治方面偏弱，相對保守，「佢哋會話嘩你做乜咁激進，又上街又反抗當權者」，「耶穌咪反抗緊當權者，唔係點會比彼拉多（羅馬總督）釘上十字架。」
記者：黎瑩瑩