（獨媒特約報導）「其實政府唔搞咁多嘢，就唔會無啦啦多咗我出嚟。」社民連陳皓桓（Figo）只有22歲，驅使他投身社區服務的，是責任。過去一年，社民連唯一立法會議員梁國雄被 DQ ，副主席黃浩銘被判囚。 Figo 意識到，本為後勤的自己，需要承擔更多。
黃浩銘參選過沙田區議會兩次，均在瀝源選區落敗，但得票都超過四成。遭判監逾三個月，黃浩銘緣盡來屆區選，在瀝源的工作交棒予 Figo 。而 Figo 期望，兩年後的選舉會是一場政治表態，「你投票唔係投俾我，係投俾社民連。」
傘運改變命運
「我諗我的人生有幾個轉捩點，一就係雨傘運動，二就係黃浩銘坐監。」傘運爆發時， Figo 早已熱衷政治，初中時崇拜「社民連當紅時期」的黃毓民，及後在同學介紹下加入中學生聯盟。
六四十周年的時候，他以中學生聯盟身份接受媒體訪問，爸爸看到後很憤怒，只覺兒子不應「搞呢啲嘢」，「發晒脾氣，直情拎把刀出嚟，好恐怖。我喊到阿媽都唔認得啦緊係，離家出走咗幾日。返到屋企，我就話其實我都無做錯，我覺得應該做嘅嘢，點解唔可以俾我做？你生我出嚟做咩？」 Figo 堅持繼續參與社會運動，直到傘運，爸爸終於感受到兒子的認真，親自到金鐘探望。
獲得家人支持的同時， Figo 在傘運現場認識到一群伙伴，亦成就了他全身投入社運。原本在香港專業教育學院（IVE）讀旅遊的 Figo ，於傘運期間退學，黃浩銘邀請他加入社民連，協助籌備2015年區選，更讓他擔當選舉經理，2016年立法會選舉亦將此重任交給他。那時 Figo 才19、20歲，即使社民連內部有反對聲音，黃浩銘仍對他報以信任，讓 Figo 受寵若驚。
去年11月黃浩銘獲准保釋等候上訴，步出終審法院後與 Figo 合照。
「話俾選民知，社民連係未死」
數年來， Figo 在社民連是幕後角色，站在大小行動的背景中，少見他持咪發言。直至去年8月「13+3」事件，黃浩銘因參與反對新界東北發展示威，遭判監禁13個月。 Figo 形容當時眾人情緒低落，「全部人當時都唔知自己做緊咩」。「岑敖暉當時問我，你點解唔喊？我諗緊，如果我都喊埋一份，同你一齊喊，咁邊個做嘢？」
走在最前線的戰友突然被離場， Figo 醒覺需要有人頂替各個崗位，運動才不至陷入停頓。此後他更積極參與關於內地維權人士及外傭權益的工作，而更急須接棒的位置，就是選舉。
「老實講，我真係好唔鐘意選舉。」 Figo 自言對大政治議題較有興趣，但黨內有人入獄，有人被 DQ ，更多人尚有官司在身，刑期未明，還有機會參選的人屈指可數。反覆思量，他最後決定「捱義氣」，承繼黃浩銘在選區經營多年的成果。
Figo 指出，激進派參選區議會難度很高，選民反應兩極，「一係好憎我哋，一係好支持我哋，好難影響到中間的人」，在單議席單票制選舉中尤其失利。然而他更在意的是票數的象徵意義，「社民連在過去一兩年不停被迫害，而家我哋好多人都選唔到，所以你的一票，係支持緊我哋」，「今次我就係要話俾選民知，社民連係未死。」
失去了議席，Figo 說社民連反而更勤於搞行動，一日最多可以有三至四個示威。
不避談大政治
談到他「做區」的方法， Figo 再次強調「大政治」。「DQ咗6個立法會議員，有幾多人走落區同人解釋 DQ 的問題？無乜㗎喎。我哋社民連就由DQ前開始不停咁落區。」
他坦言近日忙於九龍西補選，只能每星期在瀝源擺一次街站，每月辦一次漂書活動。這天他派發關於施政報告的單張，批評「明日大嶼」計劃浪費萬億公帑。雖然身在新界東，他與義工也在路邊豎起了李卓人的直幡。
Figo 認為做區不能只「派嘢」、搞活動，一定要向市民講解自己的政治理念，「如果唔係，你今日派個粽，然後你去個示威，佢喺電視見到，佢唔鐘意示威，咁咪大鑊？」
「你唔應該逃避政治表態，只做蛇齋餅粽，無錯你可以 keep 到民主派選票，可能 keep 到無咩理政治嘅老人家、選民，但係好容易 backfire 。當你今次贏咗，到下一屆佢知道你係咩人，見到你示威、衝擊，佢就唔會再選你啦。」
最怕唱歌跳舞
落區約三個月， Figo 成為了街坊口中的「陳主任」、「阿陳」、「桓仔」。身為社民連成員，擺街站對他而言沒有難度，早已習以為常，大清早精神奕奕向每個路人說早晨。只是，他仍未習慣身後印著他的頭像的易拉架，總覺得笑得不自然。
問到在社區至今最大的挑戰，他的答案不是捱著腰傷清理颱風塌樹，也不是與政府部門交手，竟然是唱歌跳舞。他猶有餘悸地說起，前陣子出席一個社區活動，本以為只是負責抽獎，卻突然被叫上台唱歌。「人生第一次咁多人面前唱歌」，硬著頭皮唱了 Beyond 的歌，心情還來不及平復，「突然間再叫我上台，跳舞喎！嗰個打擊好大呀，我未試過呀，我無心理準備。」深感崩潰，腦袋被清空，那天他發出的採訪通知也寫錯字。不過，這樣「壯烈犧牲」，確實在街坊婆婆心中留下深刻印象，所以他只能繼續調整心理，日後應對更多同類挑戰。
趁年輕多做一點
年輕可以是優勢，也可以是弱點。作為後輩，很多前輩給予他教導和意見。「除了長毛，個個都叫我讀書。」起初大部份人反對他參選，到決定了投身社區，又人人提出意見，「大家覺得我可能好多嘢唔識做，或者唔想做，就叫我做、教我做。」他指與社民連的黨員結構也有關，年輕人少，大部份人有經驗，覺得他「細個」，而且寄予厚望。
他清楚有很多東西需要向前輩學習，但善意指導有時變成壓力來源。他又身兼多職，既要處理黨務、社區工作、搞行動，又要為補選宣傳，10月起他更出任民陣副召集人。他坦言「有一排真係好攰」，訊息每天排山倒海湧來，生活忙得只有政治。他笑說最近開始養狗，平衡一下，學習與壓力相處，「忟憎嘅時候就放低個電話先」，逐項完成手頭上的工作。
不斷燃燒自己，他希望善用青春，做得更多，「我有嘅係時間，只係22歲，仲可以做好多嘢，所以我先至攞好多不同崗位去做，慢慢學習。」
「這幾年，政治犯入獄、DQ、修改議事規則，佢不停打我哋；國歌法就嚟立法，再次修改議事規則，香港人究竟會不會用票去表態？我唔知，但我覺得要對人要有信心，我哋自己都要做嘢。我哋唔做，啲人咪唔投囉。你問我呢，選舉不在乎贏不贏到議席，而是能否令到社會氣氛更加好。」
「無論個運動輸咗，無論你點樣迫害我，我只要手上有一票，我都可以用票數反映我的意見。」
記者：劉軒