（獨媒特約報導）長毛梁國雄，是一名啟業邨邨民，自1988年起遷入至今。
相約長毛在啟業邨談領展，啟業商場早年出售予領匯（現稱領展），上月底以逾10億的價格轉手。
2004年，公屋居民盧少蘭提出司法覆核，指房委會無權出售資產，領匯上市被迫延遲。當時少數協助盧少蘭的立法會議員只有三人，他們是鄭經翰、陳偉業及梁國雄。
當年的長毛，是「阻人發達的政客」之一，2005年1月1日，過萬人參加了反「政客亂港」遊行，支持領匯盡快上市。盧少蘭同年在終審法院敗訴，領匯「順利」上市。
12年後的今日，被政權粗暴奪去立法會議員身份的長毛，考慮以啟業邨邨民的身份提出司法覆核，指房委會未有履行當年在法庭上的承諾，保證公屋居民有合適的商場設施。
長毛在仍然帶有老舊氣氛的屋邨冬菇亭，談他對領展、對官司、對民主派及社會運動的看法。
官司
他直言要提出官司十分困難。
2005年7月5日，代表房委會的大律師在終審法院表明，一旦領匯不能為居民提供合適的服務予居民，房委會保證以四種方法補救居民損失。長毛稱該言論引起合理期望，如今領展拆售資產，居民愈來愈難在屋邨商場獲得生活所需，「過咗12年，依家叫你做，你做不到就JR（司法覆核）。」
如今的第一步，是要去信法庭取回當日的錄音，但至今未有進展。「懷疑佢唔見咗，佢諗住都無得打，唔係唔會咁多阻濟。」
當年的承諾，是司法覆核最終敗訴的原因之一。《房屋條例》只要求房屋署有責任保障有合適的服務予居民，但並不一定需要由房屋署提供，「佢保障到提供就得。係咪房署直接提供，條例唔係好清楚。」
另一個爭拗的關鍵是，目前領展及其他商場投資者提供的服務是否適切？長毛認為其中一個判斷方法，是領匯／領展進場後令原本的服務及指定用途的商舖消失。
「以前有中醫，依家無咪唔適切囉，你未賣之前有吖嘛。」在法庭上便要由法官判定中醫是否很重要。不過長毛亦指政府的理據亦並非全無道理，「無人開酒樓，政府係咪開酒樓？佢會問返你。」屋邨無酒樓的現象，未必是由政府的行為引起。即便在前領匯、由房委會管理屋邨商場的年代，亦有採用商業原則，由政府劃分商舖比例，讓有意者競投，「無西醫嚟行醫咁點呀？我唔可以一定要令人嚟呢度，同佢拗咪蝕底。」至於餐飲服務是否適切，「除非離譜到好貴，貴到無人俾得起」，「所以佢哋咪話俾市場決定，由啲人鍾意食乜嘢。」
啟業街市
領展
「其實我哋（反領匯上市）一定啱。」
「成個問題（領展）係窮嘅問題，窮嘅人唔會受到社會注意。係呢個社會分配裡面，你嘅 income 低就唔會考慮你。」
長毛認為，公屋設施根本從來不應市場化。「呢啲設施應該係俾公屋用，應由房屋署規劃而非市場。做生意出面有大把生意做，咪喺出面做囉，出面開乜嘢我唔會理你。」
「房屋署要補貼，唔好要咁多收入都好，要保證 lower income 嘅人用到」，「睇醫生咁樣，就算整個西醫喺度，領展一加租，窮人就無法睇醫生。」
「既然公屋係平嘅，你（應該）提供啲平嘅嘢。佢（政府）話我哋痴線，呢啲係商業原則。」但長毛認為，公屋及其設施應該是社會財富再分配機制的一部份，公有財產有責任令弱勢的人都受到便利。
啟業街市今年翻新，增設「夜市」範圍售賣食品。
長毛從根本上反對循市場及消費思考領展問題。
「呢個係綱領問題，左派著重生產資料而非生活資料，傳統左派反對生產資料私有。政府介入開公共食堂俾窮人食嘢，唔用市場規則，政府補貼至佢 survive。」又以土地這個「生產資料」為例，政府不掌握的話，必然無法顧及普通人福祉。「土地必須經過開發，某些人尋租，某些人成為尋租的受害者。所以點解去到城市的中心好撚貴，覺得唔係屬於你嘅地方。你可以自由去到果度，但好難去消費。」
「無論你拿咩 income，拿20%收入出來保證安居。政府要介入，如果唔係無得拗。唔好低得過呢個標準。」
「香港人唔通過消費係無生活，屋企好細，公共設施不足，所以香港人好注重消費，用消費角度看所有問題。」即使投票行為亦是如此，「俾咗票你有咩著數先，即時喎。」這個或許是反領展運動不能擴展的問題核心。
運動
「主要政黨唔做，做呢啲野講個勢。」長毛認為民主派除了普選及政治權利問題外，社會綱領與政府分別其實十分少，「咁樣唔會有有實力的反對運動，呢個係香港政治運動嘅死結。」
「社民連講嘅社會民主主義，就係大嘢由政府做，不可以利潤化。公共服務同民生好大關係嘅全部由政府去做，唔俾市場沾手，用市場原則亦都要由政府主導，限制私人利潤。」
「要政府介入，香港人諗都唔諗，講咗幾耐依家先知港鐵由私人做係幾大鑊？」
「其他政黨係反對（私有化）個後果，唔係反對個方法。」
「呢個係唔買呢啲貨同唔卸呢啲貨嘅分別」，長毛說工會才是社會是否運行的核心，如果要杯葛一項貨品，「唔卸佢佢就死得，洗乜叫啲消費者唔好買」，「消費者運動可以搞，但不是主要。」「香港將來真的有普選，民主派內亦會有政綱之爭。」
「只有私有化，係私有化過程先令到銀行有生意做，公屋係無㗎嘛。」一間300萬的公屋，完成供款後其實要多付300萬利息，「呢個就係出售及出租公屋嘅分別，令 banker 搵錢。」持有一定數量的資產後又可以「打包」上市，從股票市場獲利。
長毛認為反對派不想反對、或認為未嘗不可，而功能團體亦不會反對，「會計師、律師靠這些搵錢」，「你間公屋邊有契做？」
「林鄭只有一個目的，就是將香港變成盡量資產化的社會，盡量炒，除此之外無第二樣政策」，「唔認識呢點，便無從反對林鄭月娥。」
「林鄭得一條死路，就係將可以私有化嘅都私有化咗佢。」
長毛認為，過去30年國際經濟的發展，便是將過往改良資本主義的政策廢除，「美國點解會搞成咁，就係將不容合併嘅法例取消，造了惡獸出嚟。」長毛指出，要將市場因素減低一定是民主，民主的重要性不是民主好過不民主，而是社會運行方法的分別。
邨民
廿九年邨民，對邨的「感情」，其實和大部份公屋居民一樣。
「我就無乜喺條村嘅老實講。」不過長毛在不同場合，都會提及自己公屋居民的身份，「講過好多次，你（在啟業邨）搞任何嘢，我一定搞你。」
「公屋居民已經分裂，年青人一早返工，夜晚回來，條邨發生咩關佢咩事？條邨對佢影響好細，又唔會喺度食嘢。」「一個普通打工仔，一星期六日工作，七半出門口，夜晚八點回來，對邨有咩歸屬感？」「正如劏房居民唔會對劏房有感情，當呢度訓覺之嘛。」
啟業邨並非出售屋邨，居民全部是租戶。1981年落成，自屬老化屋邨，人面亦已全非。1988年遷入的長毛稱，「睇住隔離搬走曬，有啲買咗居屋，有一啲調遷。」領匯進駐啟業商場後，連鎖店如日本城、大班麵包等開始進場。商場本身亦擁有一個比屋邨範圍大的市場，除了鄰近有啟泰苑及麗晶花園外，昔日啟德機場有員工會來光顧，今日則是鄰近九龍灣的商貿區員工，冬菇亭晚上的大排檔，亦有不少專程駕車前來。
記者：黃俊邦