（獨媒特約報導）獨媒日前報導民建聯區議員楊子熙在1月20日油尖旺區議會會議上，指「露宿者知有好多好玩嘢同著數」，要求加強清理，言論引起反響，楊子熙昨日在 Facebook 發聲明反駁，表示自己是「相當關心和極待解決」露宿者問題，不點名指獨媒「斷章取義，存有不負責任之揣測」。
楊子熙在聲明中指曾「多次聯同部門召開多方會議和實地探訪，商討對策，協助露宿者和處理問題」，指提交文件是「促請政府部門採取恰當措施跟進露宿者問題、並審視政策上的缺陷，協助他們早日脫離露宿生活，保障他們的人身安全和權益。」不過楊子熙又在聲明指「於露宿者聚集地搜出危害人身之毒品、衛生情況愈趨惡劣、公共空間被佔用等等，是居民每天關注和憂心的問題」。
露宿者行動委員會執委主席甘浩望神父對獨媒表示，希望楊子熙能夠切實進行實際工作，如為露宿者進行登記和竭力爭取房屋署作出合理安置。甘又表示「知道民建聯一向擁護社會主義」，呼籲楊毋忘初衷，能夠站在貧窮和弱勢一方，不會為求選票而只向中產傾斜。
楊子熙當日會議提交的文件，指露宿者聚居、有異味傳出，影響居民人身及財產安全。
楊子熙在會上曾就是項議程多次發言，全文如下：
「就住係渡船街橋底依個露宿者引伸既問題呢其實好多既，即係個位置呢，直情呢，即係今日呢係到睇得清楚，正正就係我地油尖旺好出名既地標油麻地差館，就係差館後面，係果到呢其實呢一個橋底，如果可以睇呢即係咁廣闊既行人通道呢係橋底呢而家全部擺晒雜物既，即係依度擺雜物既情況呢仲有好多露宿者，有啲我都唔知係咪露宿者係個路上到停留，各方面既活動，咁我一陣間都想聽聽呢警方就住本會管冶同埋去睇下個實際情況點。同埋呢我之前了解即係同警方既同事了解呢發覺到有唔同既冶安問題產生到既。
從呢既民政事務處個匯報都睇得到呀，15年對比14年呢治安問題呢多左好多，衛生問題呀露宿問題呀呢啲問題都係大量增加，可以話呢係居民基本上呢唔敢行平時呢個通道，通道呢日漸收窄，由其是日間既情況係咁樣既夜晚呢係更加嚴重，裡面又有唔同既雜聲呀，有時又有對於係果到訓教既人士都係有好大既滋擾既，佢訓呢到呢咁多人經過望到佢地都係唔理想既。而係宿位，我睇到社署既報告有宿位既情況應該俾佢地去安置呢，唔該。」
「咁我講野都講好多啦，姐係呢再補充呢其實幾點姐，你頭先都聽到警方呢郭sir講一啲既情況，事實上呢我知道既訊息呢，頭先林健文議員講佢果到⋯⋯頭先佢講另外一個點，懷疑佢地有藏毒呢，但而係呢個位置呢已經證實左，姐係警方呢係做個行動，甚至乎係係1月7號呢，直接係搜左19包懷疑白粉，有12片懷疑係藍精靈既毒品，咁呢有呢咁樣既藏毒既案件，其實真係你讓居民，附近既居民經過，呢到係幾個區匯聚，包括可能你係八文樓，你係佐敦啊，係油麻地啊，時常會係到經過架，姐係你叫啲居民點樣知道呢啲拘捕左呢啲藏毒既案件之後，點樣夠膽係呢個位置去，夜晚去經過啊？就算係日頭，敢唔敢去經過啊？姐係呢，係呢一方面呢，希望部門就去加強呢，就住呢啲非法既案件一定要去處理。
第二方面呢，其實之前頭先聽其他議員都講，其他區就有可以係順利成個場可以清架喎，事實上係油麻地附近，譬如之前成條街都可以清架喎，我諗有一點之前甚至乎亦同過社工同過政府幾個部門，我都有去列席呢，同啲社工呢點樣去關愛呢啲露宿者，能夠佢地，真係住係呢啲地方，其實對佢地自己既健康啊、人身安全啊都構成影響。其實呢真係能夠可以去上樓架，其實係去清理呢個，因為佢地佔左公共地方呢到呢，係政府，就算講緊佔領中環，最後都係可以成功清除，一定有手法可以去清理架，姐係係食環署呢方面責無旁貸，就住有人佔用公共地方呢，一定要進行清場架。咁或者我用埋呢一分鐘啊，咁呢一方面呢，或者真係能夠去到去小額錢債係去告你既，你咪其實影曬相，有曬警方部門做witness，我將啲物品無人認領既，擺係一個地方，等人去認領返，咁點會、點會係被人告得到呢？咁第二方面，社署……社署其實，我睇到你地既文件有，油尖旺有好多宿位架喎，佢地唔可以、可能話、我無臨時宿位，我無得住啊而繼續堅持係呢到露宿架喎，真係住係呢到對佢地自身既人身安全都構成危險。係呢一方面呢，其實社署可以做多啲嘢呢，甚至乎就係可以好似頭先議員所講嘅，一嚟嘅時候應該勸導佢走啦，如果唔係佢形成佢知道黎呢度有好多好多好玩嘅野有好多着數嘅，咁咪越嚟越滯留喺呢度囉咁，希望部門回應。」
「主席我聽左啲部門去講呢我覺得呢件事好離譜，一樣野，社署同民政事務處到今天其實你同同林鄭講左啊，其實已經有4個月，有露宿者已經半年喇，到而家你明知道南亞裔話到依家都話仲未安排搵埋啲長老話一齊去做行動，咁咁係你地依家政府應有嘅速度咩，喇跟住，地政總署、食環署仲未講添，仲要等你哋清左先可以做下一步行動，你諗下，啊郭sir俾個意見啊你發現呢度有治安問題點樣能夠治標又治本啊，治本係咪一定佔用嘅通道一定有啲情況能夠潔淨左先能夠改善到呢個治安問題啊，咁依樣野依家係有宿位喎，係佢哋你哋去勸喻佢哋能夠係嚴寒嘅時間唔好係條街度露宿，應該有好多手法呢去改善呢啲咁嘅問題，我想問一句會唔會其他半年前有其他隧道係染布房街都能夠成功清左場，啲露宿者有家可歸，幾時做我要求如果下一次續議有關事項，希望下次能夠妥善解決呢個情況。」
露宿者和露宿者行動委員會本周三到楊子熙辦事處抗議，要求安置及停止清場。在渡船街露宿的露宿者「肥仔」表示，瞓街一點也不好玩和沒有著數，是在沒有辦法下才要露宿。
致各油麻地區街坊：
楊子熙議員辦事處聲明
某媒體於1月26日發佈一則報導，內容有關1月20日油尖旺區議會上，討論露宿者問題的會議情況，當中對子熙於會議上之言論斷章取義，存有不負責任之揣測。
過去，子熙多次聯同部門召開多方會議和實地探訪，商討對策，協助露宿者和處理問題。作為區議員，子熙亦須回應居民的意見，愈來愈多的露宿者聚集，確實對居民周遭之生活環境造成影響：於露宿者聚集地搜出危害人身之毒品、衛生情況愈趨惡劣、公共空間被佔用等等，是居民每天關注和憂心的問題。
故此，子熙提呈文件促請政府部門採取恰當措施跟進露宿者問題、並審視政策上的缺陷，協助他們早日脫離露宿生活，保障他們的人身安全和權益。子熙重申，妥善安置露宿者是子熙和辦事處團隊相當關心和極待解決的問題，懇請社會各界認清事實，一同解決露宿者棲身街頭的社會問題。
油尖旺區議員
楊子熙 啟
2016年1月28日
記者：麥馬高、李巧兒